Mensahe
Sa Ika-43 Anib
Ni Andrea Sumulong
Tagapagsalita ng Kabataang Makabayan
Nobyembre 30, 2007

Malugod na pagbati sa kasapian, mga alyado at tagasuporta ng Kabataang Makabayan sa Pilipinas at ibang bansa!

Ngayong ipinagdiriwang natin ang apatnapu’t tatlong taong rebolusyonaryong pakikibaka ng Kabataang Makabayan, marapat na gunitain natin ang kabayanihan ng mga kabataang nagbuwis ng buhay sa pakikibaka. Pagpupugay sa napakaraming kabataang nagpursige sa pag-oorganisa sa kanayunan at kalunsuran sa gitna ng kampanyang Todo-Gera ng rehimeng US-Arroyo. Patuloy na umiigting ang karahasan ng estado laban sa rebolusyonaryong pwersa at mamamayan pero patuloy na nabibigo ang rehimen dahil hindi magagapi ng panunupil ang paninindigan sa pakikipaglaban.

MGA PAG-UNLAD NG KM SA TAONG ITO

Kinatatampukan ang taong ito ng pagpupursige sa pag­papaunlad ng kilusang masa para patalsikin ang rehi­meng US-Arroyo dahil sa mga kasalanan nito sa mamamayan. Tampok sa labang ito ang paggiit ng karapatan sa edukasyon at ang pagkundena ng kutsabahan ng rehimen sa malalaking kapitalista-edukador. Mahigpit nating ikinawing ang batay­ang isyu ng edukasyon bilang karapatan ng kabataan at mamamayan sa malawak na isyu ng kahirapan at pam­bubusabos, pasismo ng estado, at sa mga maniobrang pampulitika ng rehimen.

Masigasig ding lumahok ang kabataan sa anti-mamamayang VFA na tampok sa kaso ng panggagahasa sa kabataang kababaihan ng isang sundalong Amerikano. Ito na ang pinakamalaking tagumpay sa labanang ligal laban sa mga sundalong Amerikano.

Nagpursige din ang KM sa paglalatantad ng pinakamarumi at pinakamadugong eleksyon sa kasaysayan ng bansa.

Nakiisa din ito sa laban ng mga maralitang taga-lungsod sa gitna ng malawakang demolisyon at ng mga magsasaka sa isyu ng kahungkagan ng programa ng gobyerno para sa reporma sa lupa.

Nitong huli, matiyagang umabot ang mga kabataan sa mamamayan para ipalaganap ang kasuklam-suklam na pangungurakot at panunuhol ng rehimeng US-Arroyo.

Ipinagpatuloy din ng KM ang pagsisikap sa konsolidasyon ng kasapian para sa higit pang paglakas ng kilusan ng kabataan at estudyante at ng buong rebolusyonaryong kilusan.

Masiglang ikinampanya at pinangunahan ng KM ang mga kabataan sa pagsanib sa batayang masa. Maraming bilang ng kabataan ang lumahok sa pakikibaka sa kanayunan upang pagsilbihan ang kanilang Tour-of-Duty at sumampa bilang pultaym na pu­lang mandirigma. Kapuri-puri ang matiyaga nilang pag-aaral sa hanay ng batayang masa.

Naging masigla rin ang kampanya ng KM sa pagbibigay ng suporta sa Bagong Hukbong Bayan sa paraang materyal at pinansyal, paglilipat ng kasanayan sa gawaing propaganda, at paglikha ng maraming propaganda tungkol sa armadong pakikibaka.

PAGTINDI NG KRISIS NG LIPUNANG MALAKOLONYAL AT MALAPYUDAL

Sa taong 2007, nasaksihan ng kabataan at sambayanan ang patuloy na pagsahol ng krisis ng sistemang malakolonyal at malapyudal sa Pilipinas.

Todong ipinag-ingay ng rehimeng Arroyo ang 7% paglago ng ekonomiya, na pinatampok nitong walang katulad sa huling kasaysayan ng bansa. Ang totoo, gayunman, nakabatay ito pangunahin sa mga proyektong pang-imprastruktura ng gobyerno – na nakasandig nang malaki sa dayuhang pautang – at sa patuloy na pagdagsa ng remitans ng mga migranteng Pilipino. Bangkarote pa rin samakatwid ang ekonomiya, hindi nakabatay sa pagpupundar ng mga industriyang kinakailangan ng isang maunlad na bansa. Hindi rin patunay ng anumang makabuluhang pag-unlad ang ipinagmamalaking pagtungo ng mga kumpanya ng call center sa bansa, na humihigop pa nga sa lakas at talino ng mga nakapag-aral na kabataan.

Katunayan, sang-ayon sa indipendyenteng mga sarbey, dumami ngayong taon ang mga Pilipinong itinuturing ang sarili na mahirap, at dumami rin ang nagsabing nakakaranas sila ng gutom. Dumami pa ang walang trabaho, gayundin ang mga naghahanap pa ng dagdag na trabaho. Patuloy ang pagtalilis ng mga kababayan natin papalabas ng bansa, para magtrabaho sa ibayong dagat. Kapansin-pansin din ang pagdami ng mga nagpapatiwakal at nagpapakita sa publiko ng kawalan ng pag-asa sa buhay. Tampok na halimbawa ang pagpapakamatay ng isang batang babae sa Davao dahil sa kahirapan. Halatang nabulabog ang rehimen sa kanyang ginawa, na nagpapakita namang alam nito, pero pinagtatakpan nito, ang papatinding kahirapan sa bansa.

Busabos pa rin ang kabuhayan ng nakakarami nating kababayan. Sa kabila ng panawagan ng mga manggagawa para sa P125 dagdag-sahod , mumong P25 pesos ang idinagdag sa kanilang sahod. Patuloy pa rin ang kontraktwalisasyon sa paggawa, ang pagsupil sa pag-oorganisa at pagkilos ng mga manggagawa. Nananatili ang pyudal at malapyudal na pagsasamantala sa mga magsasaka at manggagawang bukid. Sa halip na pondohan ang tunay na reporma sa lupa, maingay na ikinampanya ng rehimen ang ekstensyon ng Comprehensive Agrarian Reform Program, ang programa nito para sa pekeng reporma sa lupa – kasabay ng pagkamkam sa lupa ng malalaking panginoong maylupa at ng gobyerno. Rurok ang 2007 ng demolisyon ng mga kabahayan ng mga maralitang tagalungsod, dahil sa mga proyektong “pangkaunlaran” ng gobyernong mas pumapabor sa malalaking dayuhan at lokal na kapitalista.

Sa kabilang banda, patuloy ang pagtaas ng presyo ng mga bilihin at singilin sa kuryente at tubig. Tuluy-tuloy rin ang pagtaas ng singil sa batayang mga serbisyong katulad ng edukasyon, kalusugan at pabahay. Malaya ring nakapagtaas ng presyo ng langis ang malalaking korporasyon, dahil sa pagpahintulot ng Oil Deregulation Law. Dahilan ito para magtaas ng pamasahe ang transportasyong pampubliko sa iba’t ibang bahagi ng bansa.

Sa kabilang banda, sa halip na ipatupad ang pambansang industriyalisasyon at tunay na reporma sa lupa, patuloy ang rehimen sa pagpapatupad sa kontra-mamamayang mga programa at patakaran sa ekonomiya.

Patuloy ang rehimen sa balangkas ng denasyunalisasyon, liberalisasyon, pribatisasyon at deregulasyon sa ekonomiya. Nagsara ang nakaraang taon sa pagbasura ng sambayanan sa pakanang baguhin ang Konstitusyong 1987 para bigyang-daan ang todo-todong pagdambong ng mga dayuhan sa ekonomiya ng bansa. Makikita rin ito sa pangangayupapa ng rehimen sa kagustuhan ng imperyalismong US na patakasin ang sundalong Amerikanong nahatulang maysala ng paggahasa sa isang Pilipina sa Subic isang taon na ang nakakaraan; na ipagpatuloy ang programang Balikatan at ang interbensyong militar ng US sa mga tunggaliang dapat sana’y internal lamang sa bansa; na ipagpatuloy ang mga giyerang agresyon nito sa iba’t ibang bahagi ng mundo sa palusot ng “pandaigdigang digma laban sa terorismo”.

Patuloy na giniyagis ngayong taon ang rehimen ng mga eskandalo ng katiwalian at korupsyon – na sa katunayan ay premyo para sa mga burukrata-kapitalista ng imperyalismong US . Bukod sa dati nang kaso ng Diosdado Macapagal Ave., fertilizer fund scam, Venable LLP, at maraming iba pa, tumampok ngayong taon ang pagsiwalat sa maanomalyang kontrata para sa National Broadband Network sa kumpanyang ZTE ng Tsina. Isang di-inaaasahang saksi ang nagturo sa pagkakasangkot ng Unang Ginoo, at ni Gng. Arroyo mismo sa suhulan kaugnay ng kontratang ito – si Joey de Venecia, anak ng mismong speaker ng Kongreso.

Kaugnay nito, sumingaw rin ang kahiya-hiyang panunuhol sa mga kongresista at lokal na pulitiko sa mismong Malakanyang. Sa mismong State of the Nation Address o Sona ni Gng. Arroyo, namudmod siya ng mga proyektong pang-imprastruktura na walang iba kundi pagkukunan ng kurakot ng kanyang mga alyado. Hindi kataka-taka, kung gayon, na itinuring ang Pilipinas na pinaka-tiwaling bansa sa daigdig noong gitna ng taon, at isa sa pinaka-tiwali sa katapusan ng taon. Mismong ang World Bank ay nagpakita ng pagdududa sa kakayahan ng rehimeng ito na magpatupad ng mga proyektong “pangkaunlaran” nang malinis, o nang wala gaanong katiwalian.

Dahil sa ganitong mga patakaran, inani ng rehimeng Arroyo ang galit ng sambayanan, at maging ng ibang paksyon ng mga naghaharing uri sa bansa. Alam ng rehimen kung mamumuo at iigting ang pagkilos ng sambayanan, bibitawan ito ng among imperyalismong US , at papalitan ng panibagong tutang rehimen. Kaya naman ginawa ng rehimen ang lahat ng paraan – tampok ang lantaran at lahatang pasistang panunupil – para makapagkapit-tuko sa kapangyarihang ninakaw nito sa pamamagitan ng pagdaya sa eleksyong 2004. Ngayong 2007, nagpatuloy, at sa ilang bahagi ay sumahol pa nga, ang pasistang panunupil ng rehimeng Arroyo sa sambayanang Pilipino at sa iba pang kalaban nito sa pulitika. Kaalinsabay na nito ang iba’t ibang maruming taktika.

Sa balangkas ng Oplan Batay Laya 2, at laban sa rebolusyunaryong kilusan ng mga mamamayan, pinatindi nito ang militarisasyon sa kanayunan. Nitong huli lamang, nabalita ang paglikas ng daan-daang mamamayan sa Surigao del Sur dahil sa atakeng militar ng gobyerno. Ipinagpatuloy nito ang pagdukot sa mga konsultant ng National Democratic Front para sa usapang pangkapayapaan. Tampok dito sina Leo Velasco at Prudencio Calubid. Mismong si Elizabeth Principe, dinukot nitong Nobyembre sa Cubao, Quezon City, ay nagsabing kung hindi dahil sa pakana ng gobyernong palabasing may sabwatang Kaliwa-Kanan para sa pag-aalsa nitong Nobyembre 29 ni Sen. Antonio Trillanes IV, ay hindi siya ilulutang ng mga dumukot sa kanya. Nitong 2007 din, nagawa ng rehimeng ipadakip si Prop. Jose Ma. Sison dahil sa mga kaso ng pagpatay na napatunayan ding gawa-gawa ng korte.

Laban naman sa hayag na demokratikong kilusan ng mga mamamayan, ipinagpatuloy ng rehimen ang pagsasagawa ng ekstrahudisyal na pamamaslang at pagdukot sa mga lider at kasapi ng progresibong mga organisasyon at party-list. Patuloy ang pagtatangka ng rehimen na takutin at ligaligin ang kanilang hanay. Nananatili pa rin ang hayag na patakaran nitong hadlangan at durugin ang lehitimong kilos-protesta sa lansangan ng mga mamamayan. Nitong panahon ng eleksyon, pinakatan ng mga militar maging ang mga komunidad ng maralitang tagalungsod na kilalang may presensiya, kung hindi man balwarte, ng progresibong mga party-list. Iniratsada rin ng rehimen ang pag-apruba at pagpapatupad sa Anti-Terrorism Law na sa pagkakaalam ng marami ay gagamitin laban sa makabayang kilusan ng mga mamamayan, higit pa sa diumano’y mga terorista. Dahil walang mapala sa pagtatangkang “durugin” ang NPA, ibinabaling ng pwersang militar ng rehimen ang galit sa hayag na kilusang masa.

Marami pang maruming maniobrang ipinatupad ang rehimeng ito ngayong taon. Sa pamamagitan ng pamumudmod ng pondo mula sa kabang-bayan at pandaraya sa resulta ng halalan, tiniyak ng rehimeng mayorya ng pwesto sa Kongreso ang mapupunta sa mga alyado nito. Muli, nagsampa ito ng mahinang reklamong impeachment para mahadlangan ang paghahapag ng malakas na reklamo. Lantaran nitong sinuhulan ang mga kongresista at lokal na pulitiko para ibasura ang nasabing reklamong impeachment. Sa harap ng pag-init ng kontrobersyang nag-uugat sa paglalantad ng batang De Venecia sa anomalya sa kontratang NBN sa ZTE, nagpakana ang rehimen ng pagpapasabog sa Glorietta, mataong mall sa Kamaynilaan, para ilihis ang atensyon ng taumbayan papalayo sa mga imbestigasyon. Gayundin, sa harap ng nakaambang pagbasura sa reklamong impeachment, nagpakana itong muli ng pagsabog sa Batasang Pambansa na pumatay sa lima at sumugat sa marami pang iba.

MGA TAGUMPAY NG MGA MAMAMAYAN, PAGKAHIWALAY NG REHIMENG ARROYO

Dahil napakainam ng kalagayang inilalatag ng rehimeng Arroyo para labanan ito ng sambayanan, at para makibaka ang sambayanan para sa tunay na pagbabago ng lipunan, at dahil din sa kahandaan ng rebolusyunaryong mga pwersa na sagpangin ang napakainam na kalagayang ito, nakamit ang ilang mga tagumpay.

Bagamat nagpapatuloy pa rin ang ekstrahudisyal na pamamaslang, nabawasan na ito kung ihahambing sa dami noong 2006. Maraming salik ang nag-ambag dito, pangunahin ang malakas na pagsisikap na ilantad sa dayuhang mga gobyerno ang rekord sa karapatang pantao ng rehimeng Arroyo at maksimisahin ang maraming larangan ng paglaban para sa karapatang pantao tulad ng Korte Suprema. Salik din dito ang pagpaparusa ng Bagong Hukbong Bayan sa kilalang mga kagawad ng mga death squad ng gobyerno. Nakapaglunsad ng mga taktikal na opensiba ng BHB sa buong bansa. Tuluy-tuloy na nailantad at nalabanan ang samu’t saring abuso ng rehimen.

Umiigting ang mga bangayan ng mga naghaharing-uri. Lumalalim ang pagkabiyak ng naghaharing koalisyon habang tumitibay ang banta ng oposisyon.
Si Arroyo at ang dating kakampi na si Jose de Venecia ay kumikilos para mapatalsik ang isa’t isa dahil sa papel ng huli at ng kanyang anak sa pagbubunyag ng anomalya sa ZTE. Sa hanay din mismo ng reaksyunaryong sandahatahang lakas, tumitindi at lumalawak ang kaguluhan at demoralisasyon. Marami ang sukang-suka na sa katiwalian at karahasan ng rehimeng ito. Marami ring tinamong pinsala ang mga pwersa nito sa nagdaang buwan. Sa tindi ng pampulitikang krisis ng kasalukuyang rehimen, napakalaki ng pag-asang matapos ang paghahari nito sa madaling panahon at mabigo ang plano nitong manatili sa poder lampas 2010.

PAGLABAN NG MGA MAMAMAYAN

Hangad ng mamamayan ang pagwawakas ng terorismo, pandarambong at panunupil ng rehimeng US-Arroyo. Para magawa ito, kailangang pausbungin ang masiglang kilusang masa, isulong ang mga pakikibakang bayan at palawakin ang nagkakaisang prente. Napakainam din ng kundisyon para maglunsad ng mga taktikal na opensiba para pinsalain ang pinakasagad-sagarin na tuta at pasistang militar at pulisya sa kampo ni Arroyo.

Tungkulin ng mga kasapi ng KM na:

1. Paigtingin ang kilusang masa at pang-masang propaganda. Kailangang isulong ang kilusang pagpapatalsik sa balangkas ng Pambansa-Demokratikong Kilusang Propaganda. Malaking hamon sa Rebolusyunaryong Kilusan ng Kabataan at Estudyante kung paano komprehensibong itataguyod ang pakikibaka ng masang anakpawis at pamunuan ang sektoral na laban ng kabataan. Susi dito ang masigasig at masinsing propaganda-edukasyon at propaganda-ahitasyon sa masa.

2. Paigtingin ang kilusang masa laban sa karahasan ng rehimen. Ang pakikibaka laban sa pasistang karahasan ng naghaharing rehimen ay kritikal na bahagi ng pangkalahatan pagsisikap na labanan ang rehimeng US-Arroyo. Isagawa ang pagdaraos ng mga martsa at rali, pagsasalita sa mga istasyon ng radyo at telebisyon, paglulunsad ng mga fact finding mission, pagdulog sa mga korte at paghingi ng nauukol na mga writ o ibang makatutulong na instrumentong hudisyal, pagpapatulong sa mga progresibong kinatawan at mapagdudulugang komite sa lehislatura, pakikipagugnayan at pag-uulat sa mga pandaigdigang institusyong nangangalaga sa karapatang-tao at iba pa. Sikaping magpalaganap ng propaganda sa pambansa at internasyunal na antas sa pamamagitan ng iba’t ibang porma ng midya.

3. Magpurisge sa Gawaing Organisasyon. Kailangang itayo ang mas maraming balangay ng KM sa mga paaralan at komunidad. Kailangang masigasig na magrekluta ng KM bilang konsolidasyon sa pinaka-abanteng masang aktibista. Dapat iresolba ang mga kahinaan sa konsolidasyon at pagpapagana ng balangay. Kailangan ding isistematisa ang pagpapasulpot at pagsasanay sa mga kadre ng KM. Dapat ding sumuporta ang KM sa pagbubuo ng RKL sa hanay ng maralitang lungsod at kababaihan sa mga komunidad.

4. Magpursige sa Gawaing Edukasyon. Kailangang planuhin ang pagtataguyod sa PADEPA. Kailangang magpapalalim sa mga pag-aaral ng mga isyu sa pamamagitan ng mga paglulunsad ng mga pananaliksik. Dapat ding magpatupad ng komprehensibong programa para sa pampulitikang edukasyon ng mga kasapi. Dapat ang KM ang pangunahing makinarya sa gawaing edukasyon.

5. Bumuo ng Tanggulan o Self-Defense. Kailangang magsinsin sa pagbubuo ng kilusang lihim. Dapat itayo ang komite sa depensa. Dapat ding ayusin ang kontra-intel ng bawat yunit. Dapat ding gamitin ang lahat ng posibleng paraan ng mabilis at malawakang paglalantad at paglaban sa mga kaso ng pang-aabusong militar at iba pang karahasan ng estado. Itayo ang mga organisasyon, komite at grupong tagapangalaga sa karapatang- tao sa lahat ng sulok ng bansa—sa bawat baryo, sityo at kalsada. Ayusin at palakasin ang sistema para sa mabilis na pag-uulat mula sa antas baryo tungo sa mga pambansang organisasyon ng mga tagapagtaguyod ng karapatang-tao at masmidya, at paghingi ng tulong ng mga maaasahang abugado, taong simbahan at iba pa.

6. Bumuo ng at ipatupad ang programa para sa pagsuporta sa kanayunan. Kailangang planuhin ang kampanyang integrasyon. Dapat bumuo ng mga network para sa lohistika at serbisyo sa BHB. Dapat ding maglunsad ng mga pag-aral na nagpapalalim sa paggagap ng mga kasapi sa linya, estratehiya at taktika at programa ng demokratikong rebolusyong bayan. .

Kilala ang rehimeng Arroyo na korap, tuta ng imperyalista at pasista. Maraming pakana ang pangkating Arroyo para makapanatili ito sa pwesto lagpas sa 2010. Pero, hindi pa tapos ang laban. Sa ika- 43 taong karanasan ng KM sa paglilingkod sa kabataan at masang Pilipino, mas malakas na haharapin ng KM ang pag-aambag sa pagsusulong ng interes ng kabataan at mamamayan, paggiit ng kaparu­sahan sa mga pasistang kriminal at pagpapabagsak ng kasalukuyang naghaharing pangkatin.

Lumahok sa armadong pakikibaka at wakasan ang paghahari ng tuta, mandarambong at pasistang rehimeng US-Arroyo!
Mabuhay ang Kabataang Makabayan sa ika-43 taong paglilingkod nito sa sambayanan!
Mabuhay ang sambayanang lumalaban!